Huling Linggo na ng 2020 television series na “Bagong Umaga” ng ABS-CBN Network. Ano kaya ang gagawin ni Tisay na ginagampanan ni Heaven Peralejo para idiin si Diana na ginagampanan naman ni Glydel Mercado sa kanyang mga krimen at para buuin muli ang dalawang pamilyang iningatan niya?
Kinahaharap ngayon ni Tisay ang pinakamatinding pagsubok sa kanyang buhay dahil sa nawasak na ang kanyang dalawang pamilya sa patuloy na paghihiganti ni Diana sa huling linggo ng “Bagong Umaga.”
Para makaiwas sa panganib, pumayag si Tisay na manatili sa pamamahay nina Maggie (Sunshine Cruz) at Ian (Cris Villanueva). Pinirmahan na rin niya ang mga dokumento para maging legal na siyang Veradona, na masidhing tinutulan at ikinagalit nina Monica (Nikki Valdez) at Jose (Keempee de Leon).
Mas lalala pa ang sitwasyon dahil malalaman nina Angge (Michelle Vito) at Diana na sila ay mag-ina. Hindi matatanggap ng dalaga ang katotohanang ang inang kanyang matagal nang hinahanap ang may kagagawan sa gulo at trahedya sa buhay ng kanyang mga kaibigan at kinalakihang pamilya.
Paano ngayon haharapin ni Diana ang rebelasyong buhay pala ang kanyang anak? Mabuo pa kaya ni Tisay ang kanyang mga pamilya?
Panoorin ang huling linggo ng “Bagong Umaga” sa A2Z channel sa free TV at digital TV boxes gaya ng ABS-CBN TVplus, sa cable at satellite TV sa Kapamilya Channel, sa Kapamilya Online Live sa YouTube channel at Facebook page ng ABS-CBN Entertainment, at iWantTFC. Sa labas ng Pilipinas, mapapanood ito sa The Filipino Channel.
Para sa updates, sundan ang @abscbnpr sa Facebook, Twitter, at Instagram o bisitahin ang www.abs-cbn.com/newsroom
